💛المرايا❤️
=====
فى عيونك ألف غايه
تحكى 100 مليون حكايه
آجى أرسم فيكى حلمى
تطلعيلى فى المرايا
كنت أصدق فيكى ظنى
تخلفى كل الروايه
وأما يسبقنى حنينى
تبعتى طيفك غوايه
إنتى فاكرانى أسيرك
فى مسيرك خطوه جايه
ولا فكرانى هسيبك
تغزلى موال أسايا
كنتى لما تبعدى
تحرمينى من هنايا
وأما تيجى تقربى
ترمى نظره لناس سوايا
إنتى ليه بتعذبينى
ليه بتنسى سنين هوايا
فاكره حضنى لما خدنى
للقمر نور سمايا
فاكره وردك لما ضلل
بالعبيرسكة منايا
كنت باخد فرحنا
بالهنا يسهر معايا
واحضن الأحلام فى مركب
فيها موج الشوق ندايا
لازم أبعد لازم أعند
لازم أرحل للنهايه
بس خايف حاجه واحده
نظرتك تبقى البدايه
يومها هارمى الشوق فى حضنك
وانسى نفسى والحكايه
وابعت الأيام لرحله
زادى فيها يحيى غايه
وأخطفك لأبعد جزيره
فيها صورتك والمرايا
=====
بقلمى سامح توكل أبوالسبح
Aucun commentaire:
Enregistrer un commentaire