#المرايا
#15/3/2017
دخان سجايرى والاغاني ووحدتي
مبيعملوش المعجزات
مبيهدموش ماضي اتبني
علي حافه من شريان نزف
مبيقبلوش حتي الاسف
لو يوم افارق ضلها اللي اترسم
داخل مرايا مصممه نبش الجراح
او صوت نداها اللي ارتبط
بالليل ووجعي وعزلتي
انا لسه سامع همسها
"ارجع بقي"
وازاي هعود وانا سبتها او هي سابت حلمنا
مين اللي جمع شملنا او حتى دبل وردنا
احنا اختلفنا ف التبادل ف التهم
رغم الوجع لسه المرايا ف عرضها للذكريات
ولسه صوتنا ف المكان
انا بعشقك بتنفسك بحي اما ايدي بتلمسك
بحلم بكوشه وبيت سعيد ملكه وملك
بحلم اكون اب لولد منك يكمل فرحتي
او بنت تشبه امها
فاحبها فتغيري مني واضمها
واضحك ف سرى وازعلك
وانا قلبي مليان بالحنان
انا كل حاجه منك انتي بحبها
انا كل لحظه ف قربنا بوصفها عيد
عمري الجديد هيكون خلود
صوتك حياه
لسه المرايا بعندها بتجيب مشاهد بالغلط
وقت الفرح بتجيبلي ذكري محزنه
وف حزني تيجي بذكريات بتهدني
مبقتش حاجه ف وحدتي بتشدني
ولا حتي قادر ع الهروب
فينا شئ غريب
عايشين روتين ضحك بسبب
حزن انكتب
كل اما بنقرب نسيب
مبقتش بسمع شكوتك مبقتش
حاسس لهفتك مفضلش بينا اى خيط
بقي حبنا محتاج وسيط
محتاج لروح لاجل الحياه
هو احنا ليه مفضلش منا غير وجع
اشباح ف صورة ذكريات
وانا طفل ف شوارع باريس
تحت المطر من غير هويه أو طموح
لسه المرايا مصممه
ع النبش ف قبور الندم
ف رتوشها مشهد وحدتى
شوفى كنا فين وبقينا فين
عايشين روتين
بقى بينا حاجز معزولين
مش سامعه ليه نار شكوتى
القرب بينا اربع حيطان
البعد من سم الكلام
كان حد غيرنا بيختلف
سلمنا روحنا للعناد
البعد ذاد فينا الوجع
انا كنت فعلا مش جدع
وسط الطريق
والله انا رغم النفس
ميت ولكن بالبطئ
انا كنت مذنب انما
لسانى من ذنبك برئ #ابراهيم_جمال_ابومالك
Aucun commentaire:
Enregistrer un commentaire